今日去左深圳卓越中心的耳道試下採耳，第一次採耳的感覺好新鮮，同我預期中的採耳都幾唔同，原來唔洗打側訓，平訓就可以，佢首先會開個cam比你睇下你兩邊耳仔入面咩環境，佢話我冇咩耳石，都幾健康，係入面紅左少少，可能熱氣，我見到左邊有舊大耳屎。
之後佢就會先幫我按一陣頭，好舒服既頭部按摩，大概1分鐘左右，之後開始採耳，首先右邊耳仔，拎支羽毛掃幾下，然後放個筒入去，之後就慢慢伸d細細支既野入去了耳仔，過程完全冇痛既感覺，甚至都唔係好feel到拎左舊耳屎出黎，偶然感覺到刮緊少少，都係好輕力，之後就第二邊耳仔，舒服到我都訓左陣，45分鐘其實都好足夠，兩邊做曬。做完之後聽野又唔算清好多，可能我本身冇咩耳屎，但係全身都鬆左好多，採耳係幾舒服，呢間店每人獨立房，木系設計，好似太空倉，訓得好舒服，又有花茶飲，而且佢慢慢做，播下音樂好寫意，繼腳底按摩之後發掘到一個新的享受，價錢就200蚊人仔，我覺得係幾值得的，因為呢一個鐘佢真係做足，而且中途佢係唔會同你講野，比你全程寧靜的享受，又唔會好似去水立方按摩咁，全程聽個阿姐係度講自己有幾窮有幾慘搵幾少去搏你比多少少小費，明碼實價，做完就走，有禮貌，體貼周到的服務。
下次去會試下佢個頭療，頭部按摩都想試下，太太試左頭肩頸話超級舒服，舒服到唔想走，身心都得到療癒，意外地發現到新的拍拖節目。
