早排1月中行龍脊，完全冇任何難度的山徑，好行，而且望到石澳泳灘，還有石澳半島外的兩個小島五分洲和大頭洲，風景好好，原來山頂叫打爛埕頂山，個名幾得意。山頂望落去會見到兩座比較明顯的樓房，黃色我對照網上資料，估計可能係馬化騰的屋企，而紅色可能是信和定唔知會德豐家族居住的地方。咁近望到富豪的屋企，感覺幾特別。
《半考牌路線之環船淡水湖一圈》
一直都想環繞船灣淡水湖一個圈，今次決定試下，睇返全程，我地首先由大埔墟搭小巴去烏蛟騰，然後向九担租方向行去船灣淡水湖郊遊徑。
船灣淡水湖係漁護署難度最高的郊遊徑，雖然唔係最長，但要上好多座山，上上落落對體力的消耗的好大，難度就唔高，但係就好長。
11時41分由烏蚊騰出發，好快就搵到入口上第一座山峰馬頭峰，我地12時22分到達295米的馬頭峰，行了大約45分鐘，開始可以望到船灣淡水湖的景色，一條筆直的長壩直削天地。原來當時興建船灣淡水湖時水位將大埔六村淹沒，1960政府決定將村民集體安置於大埔墟，所以至今在廣福道可見到一些4層高的建築物，就是當時的村民及後代所居住的地方。
繼續前進，發現一個路牌「前路極為艱辛難行，山徑陡峭，林蔭極少...」向這個路牌展開我地環湖之旅。大約1時48分到達大峒。原來不知不覺已經行了1.5小時了。遠處可以進到沙頭角鹽田港景色，另一個方向可以望到更清楚的船灣淡水湖，一座座小山頭環湖並列，天氣晴朗，唔算太熱。
之後行了15分鐘就到達觀音峒，時間是下午2點零6分。沿途我都有影低標距柱。慢慢就可以見到多少少印洲塘。印洲塘特點係好平好靜，印洲塘英文名好得意，叫Double Haven，因為被Double Island灣洲及吉澳Crooked Island包圍，所以水流唔急，好寧靜的內港。
繼續向前行會比較多上落，慢慢地勢會變得愈來愈陡峭，中間我地經過左紅石門岰的入口及石芽頭，仲記得當日行迷椏走廊挑戰失敗，唔知幾時再次挑戰。大約3點13分我地到達280米的鹿湖峒，普遍船灣的山唔會高過300米，但好多係落到好低再上返去，所以全程爬升左成1037米，對體力的要求都好高。
去到鹿湖峒之後發覺前方仲有路，於是我地唔環湖，繼續往海角方向前進，查地圖知道前面係跌死狗，覺得有d危險，冇打算行到好入，但行入d就會發覺跌死狗其實都唔係好高，太約只有295米，而且難度唔係好高，都係比個名嚇親，但景色方面就可以睇清楚曬成個印洲塘景色同埋外面島嶼，群島包圍的印洲塘湖水湛藍而山色碧綠，加上冇咩人行到黎呢邊，可以好好享受寧靜的遠足之旅。
我覺得難度方面唔算太高，但注意要有足夠補給，因為沿途係冇任何可以買水的地方，但係路線都比較明顯，冇咩分岔路，仲有絲帶指引，慢慢行基本上都輕鬆，主要係前半段比較辛苦，後半段十分輕鬆。
再行到去238米的鳳凰頭，由於時間關係我地就此回頭，因此時間已經是3點半，見到有幾個人由鳳凰頭上黎，查一查先知原來前面仲可以行多幾個山頭去埋白角山，昂莊山再去黃竹角咀摸鬼手，下次可能要早少少去先得，因為新聞見過有人在鳳凰笏頂迷路。
冇摸鬼手，我地行返去鹿湖峒，之後環湖繼續行，經過219米的鵝髻頂之後行去虎頭沙，再去125米的長牌墩，其實高度唔算好高，路都比較易行，但係就多數都係樹林路，冇咩開揚位睇外島景色，只係望到淡水湖的景色，望返之前行過的幾座山頭，發覺原來都行左好多座山。
最後我地行去溢水壩，然後會見返石屎路，之後的路途都冇咩難度，普通大壩行人路，行返出去大尾督就可以搭小巴離開，但天色已經入黑，好多蚊滋飛黎飛去，所以都係早去更好，及早離開。
總結，路途都幾有挑戰性，環湖作為一個行山目標也未嘗不可，但係後段大壩的路其實都幾悶，如果下次可能去黃竹角咀之後原路走會比較舒服，因為之後大壩的路極度漫長，而且冇咩挑戰性，景色都普通，但不少跑山人士會選擇作為挑戰體力的路段，最後我地由上午11點36分行到下午7點11分，總共行左7.5小時，距離是21.53公里，最高點只有305米。今次補給充足，行到十分自在，落到山所有野都食曬飲曬，輕裝回家。
《終於可以行上馬鞍山山頂，成就達成！！》
一直以來都好想行一次馬鞍山山頂，因為住馬鞍山，由細到大都望住座山，但又因為吊手岩呢個名好恐怖，所以一直都冇上過去。
琴日就嘗試挑戰馬鞍山，我地由馬鞍山郊野公園的家樂徑出發，一直向上行，沿途比較多樹，難度唔係好大，但就冇咩景睇，方向係背向馬鞍山市區，天氣都唔錯。之後上一段泥路會到家樂徑盡頭，會見到一塊牌，寫住「前面小路附近曾發生致命或嚴重意外，請勿前往」，就係吊手岩的入口。
開始上山，依然係泥路，上到半路回頭望會見到馬鞍山村的平原，之後我地冇揀雁谷迷陣的方向去，而係繼續直行，上到大約400米左右，都係泥路，唔算難行，幾好行。
望上山上面會見到一大舊石頭，我都唔知係咩石。遠處會見到馬鞍山。之後會上到一塊小平地，望出去可以見到成個馬鞍山市區，排得好整齊的樓，遠處仲有船灣淡水湖同埋八仙嶺，仲有中文大學同埋後面大帽山，好開揚的吐露港景色，絕對係值得為呢個景色走一次。
行多陣仲可以見到銀湖天峰迎海方向的建築物，右手面就有一座山頂，唔知叫咩名。我估計可能係靈猿守谷都未定，都幾特別。
之後就繼續上泥路，依然唔算太難，話口未完，就開始黎料，接下來係一段好多沙石的路，而且斜度都唔小，就係我youtube睇片見到的泥石路，不過比我想像中有d唔同，現實條路好似闊少少，冇睇片咁危險，我手腳並用，都可以繼續爬上去。
但係之後就愈上愈斜，向下一望發覺極斜，於是當堂腳仔軟，我就坐在斜石山路上休息一陣，食番個包，感受下山路的高度，之後慢慢轉身挑選石頭爬上幾級，問題係突出的石頭都比較細粒，我好驚隻腳會滑左落去，所以唔係好敢去踩，之後又轉身坐低，如是者試左幾次。
記得第一次行呢種路的時候，我曾經有種想放棄的感覺，想慢慢落返去，但我發現落去難度都唔細，可以話係背水一戰，還不如努力爬上去上面平地休息，事實上呢條斜路又真係唔算好長，捱多幾次就發覺可以踩上去的石頭愈黎愈大舊。
後來終於見到有繩，條繩又唔整長d或者早少少放，曬氣，而家都上到冇咁斜的石路，唔洗用繩了。上到去又望返落去下面，發現都唔係好睇到自己由邊度爬上黎。。
之後行的路都冇呢段咁陡峭，由於經歷完呢段咁險要的山路，我就好輕快咁跑左上山，見到吊手岩的石頭標記，終於都完成左呢段路，以往成日都覺得吊手岩唔係一條比行山人士行既路，亦都睇過好多意外新聞，加上個名都幾恐怖，以為吊首，上去會身首異處。今次行完覺得其實都可以應付，但真係要非常非常小心，我唔知下次去會唔會跌鬼左落去，有手套就可能比較就手。
行上吊手岩令我明白到，原來我係一個好怕死的人，成日話自己咩都唔怕，但係當處於生死一線之間，平日你好在意好在乎的事都忽然之間都變得不太重要了，點解自己會為咁多無謂野而困擾呢？要珍惜生命！睇返新聞，2020年4月一名67歲男子與朋友在馬鞍山行山期間，在牛押山近吊手岩附近失足，由6米高位置墮下，跌落大石上，背部受傷。今個月一名行山人士行到近馬鞍山吊手岩附近時突感到不適，陷入半昏迷狀態。消防總隊目邱少明在馬鞍山吊手岩拯救一名休班機場特警與其女友時，失足墮崖殉職。睇完呢d新聞，實在要量力而為。
上到589米的吊手岩之後，我地冇停就繼續落少少山谷再上埋677米的牛押山，距離都好近，基本上牛押山難度不大，一口氣上去就可以。上到牛押山就可以遠望到702米的馬鞍山山頂了。
但係由牛押山行去馬鞍山山頂要經過一條好窄的山脊，左面會見到十四鄉的所有村落，我地行緊過程中都聽到新地十四鄉地盤的打椿聲音，相比起大刀屻，我覺得過馬鞍山山頂呢條山脊其實仲危險，因為好多碎石，好易滑倒，所以我都慢慢行，馬鞍山風景好正，冇諗原來個景大部份竟然係望十四鄉，以為望返沙田方向，原來馬鞍山市區係比幾座山擋住睇唔到。
到達馬鞍山山頂，係一個270的海景山景，遠望赤門海峽及一眾十四鄉樓房，坐左一陣之後就日落了，我望完日落，趕快落山，途中見到飛行服務隊救左一個人走，然後我落到麥理浩徑之後已經入黑，所以冇上大金鐘，而係繞過大金鐘去昂坪睇下露營客之後就往西貢北港方向行落山，結束今日的旅程。
總結，呢段路係幾有意思，最難的地方是吊手岩，可惜冇上到大金鐘，唔知我可唔可以忍受到大金鐘的高度呢，記得以前好害怕大金鐘，覺得極斜，所以至今都未曾登頂，希望下次有機會可以圓夢。呢次路程行左8.42公里，行左4小時左右，由下午3點半行到7點半落山。
《重構繼園街的重建歷史。。。》
繼園街係北角地鐵站對上的一條斜路，又叫繼園山，由繼園街，繼園上里及繼園下里所組成，歷史記載原來成座山都係陳維周家族的土地，即係陳樹渠的父親，其子及寶聲集團坐擁100億物業，偶亦有參與舊樓拍賣。
繼園街最出名應該係新世界的新樓盤柏蔚山，地址是繼園街1號，2018年6月2日開始發售。樓盤前身是繼園西街，城規會當年批出的發展藍圖，該處為整個繼園綜合發展區的「第一階段重建計劃地盤」，將可興建三座樓高一百二十五點六米的住宅，涉及七百個單位，最後落成後的單位數目約611伙。
當年新世界曾經以實用面積呎價約5000至6000元進行收購，至2009年9月以2.3億元購入繼園街5號維愛樓全幢，另外本年初透過強制拍賣條例，完成整合地盤。
同一條街，原來舖王鄧成波持有13個住宅單位。睇下歷史先，2018年6月中，翠領有限公司以2.62億收購60-74號共9個單位，收購呎價介乎1.3萬-1.9萬蚊呎，收購價大約由2000萬至3619萬。
首先要提的是一個車房，招牌寫住「雄發」。呢個車房特別之處在於2019年時繼園街七十四號車房，以一千萬元易手，被財團成功收購。據報道，原來有車主於10幾年前出價100萬買入，而家以1000萬出售勁賺10倍。
2019年8月，繼園街56、60及62號申請強拍，地盤面積5,968呎，1957年落成，現為樓高5層的唐樓，申請者已收購93.33％業權，項目估值約1.944億。向屋宇署申請建築圖則獲批，可重建成1幢31層高分層住宅，預計統一後可擴大發展範圍，可建樓面料逾20萬平方呎，項目目前尚未獲頒售賣令，據資料顯示2019年強拍申請37宗，只批出6宗，有研究指出有78%申請在提出後 24 個月內獲土地審裁處頒售賣令。
繼園街60-74號最細的自住單位都有一千四百方呎，部份更達一千八百方呎。繼園街64號目前已經全部清空，住戶已離去，只剩下廢棄的房屋。
《第一個公務員合作社成功強拍？》
柏雅台，是一個位於鰂魚涌的公務員合作社，該物業現狀為兩幢於1973年落成的6層高住宅樓宇，附設有一條公共樓梯將兩幢樓宇相連。而每幢大廈各自另設有一條公共樓梯。
早前曾被「釘子戶」要求賠償8,000萬元及在重建後獲得一個面積逾5,000平方呎的單位，審裁處成員認為，申請人已先後向次答辯人提出3個補償方案，價錢最高為逾2,600萬元，成員認為申請人已作出一切可行步驟，以取得地皮的所有業權，而成員亦同意大廈已日久失修，因而認為應下令將地皮進行強拍。雅居樂集團於2020年10月通過強制拍賣，以底價4.52億元投得鰂魚涌柏架山道2至8號，統一全部業權。
該物業的地盤面積約12,730平方呎，項目連同早前已獲取之三塊臨近地塊，集團有意重整地塊作合併發展。目前規劃發展方案正在準備中，初步計劃用於興建3座住宅，總發展的建築面積預計逾40萬平方呎，重建工程需於強拍完成後6年之內完成。
訂閱：
文章 (Atom)