繼續我們的旅程，我地去完西湖之後就坐車去西溪濕地，原來要門票，加上我地行程緊密，所以只係響附近免費地方行下就算。
有少許中式建築，完全冇人。
呢度應該係濕地公園範圍吧，沒有人，不少綠色植物，幾好行。
沿小路繼續前進。
到達一片樹林之間，其實冇咩睇，不過幾寧靜，同市區勁多遊客唔同感覺。
跟住我地就搭車去返市區，想去位於蘇州的拙政園，車程成兩個幾鐘，沿途我都係訓覺。
去到蘇州，先發覺原來司機係唔識路，兜極都兜唔到入去拙政園，我地就睇住地圖教佢行算，佢話自己住市郊，市區唔多識路，同埋大陸如果太多車會局部封一封路，最後我地響附近落左車，因為我大學個陣去過拙政園，所以我就自己周圍行下算，佢地就去拙政園。
落雨出入都比較麻煩。
我就自己行下蘇州市區。
每個地方都係響門口經過，因為有d要比錢，有d就多人到傻，所以唔入去啦。
遊客區都有水鄉特色的小運河，但都比較商業化，而且雨天睇落好落後。
我就漫無目的咁四圍行，感受一下蘇州人的生活。
好多遊客都會慕名比錢搭船玩下，我就冇，橋上望住佢地算。
所謂的江南水鄉面積唔算好大，最多都係一兩個屋苑的面積，而且完全係估到咩景點咩感覺，親身黎過就不難令人覺得日本的景色好好多，而且太多遊客都會大減興致。
佢地行完拙政園之後我去會合佢地，似乎佢地都冇咩特別覺得拙政園好正，少少肚餓，於是周圍行行，行到邊食到邊，去左一間地道小店，店內環境有少少中伏的感覺，但覺得一場黎到，無理由唔試下地道菜式，於是我地叫左小籠包同炒飯幾道菜，味道都係一般，我自己整或者落街買返屋企叮個味道好似仲更加好，但價錢就真係幾平，十幾蚊已經一份食物。
之前行行下就見到一間叫啞巴生煎，上網睇好似好出名，於是我地都入去買份生煎包食，發覺又真係幾好味，香港好似冇呢種風格，第一次食到好味的食物，覺得好興奮，而且價錢都係平民價，值得一試，皮脆肉汁多，幾香。
食完野就決定起程前往同里，係一個江南古鎮，車程半個鐘左右。
去到的時候由於已經係接近黃昏，加上落雨，所以好多店舖已經關門，都冇咩人，我地好似走左入一個廢棄的江南水鄉，雖然好多中式建築，但我自己就無咩感覺，同里算係比較靚的水鄉，道路同建築都完整，千幾年歷史都仲有保存到，算係咁。不過去到呢度我先發覺自己其實同中國內地的風俗都相差幾遠，因為佢賣的物品我冇一樣有興趣，食物更加係奇怪，好多都唔似廣東人口味，相反去日本咩地方的食物我都起碼食得落，所以雖然唔同國籍，但反而文化風俗上更加接近，例如同里的餅、土產全部我都冇勇氣一試，覺得似係外太空食物，敬而遠之，拍照留念的倒是有的。
再上車，搭左幾個鐘左右又黎到周莊，周莊比起同里更繁華，因為有一條好長的大街，夜晚都依然有遊人餐廳，但由於要入場費，加上唔夠時間，於是我地就只在大街拍下照，感受下就走。
金碧輝煌的門牌建築，但其實我都唔知有咩用。
呢座塔都幾好睇，但係香港比比皆是，唔覺得有咩特別。
之後我地就再搭車去朱家鎮，因為今晚目的地係上海，途中見經過朱家鎮就順便兜去望下，去到發覺已經係晚上，好多店舖都關門，基本上條街係咩人都冇，不過因為咁所以道路暢通，可以影下晚上的水鄉，可惜我器材比較差，加上天氣問題，冇法影得太豪華，感覺呢度都幾大，似係一個水鄉主題樂園，有時候我都唔知d建築係後人興建定真係古代保存至今時今日，因為某d地方都幾新，唔似起左好多年。
呢度都係倚靠旅遊觀光為生，實業應該比較空洞，令我覺得只靠旅遊業的一個社區好似冇咩意義可言，創造唔到咩文化，只係倚靠古代流傳下來的風土文化作謀生用途。例如地道食物醬油蝦、炒螺螄、鰟鮍魚、粽子、糖藕、清蒸白水魚、拉絲、熏青豆、燒賣、生煎、扎蹄、扎肉、青角薄稻米、牛踏扁青豆、鱸魚、清水大閘蟹、河蝦、鰻鱺、銀魚、塘鱧魚、醃菜莧等，我冇一樣係想食的。
呢度古代一度係商業重鎮，以布業為主，水路縱橫，有稱「上海威尼斯」，但我覺得平平無奇，名過其實，不過是有小河的一個城鎮，但呢條放生橋，原來已百多年，係上海地區最長、最大、最高的五孔石拱橋，我行上去又覺普普通通，總覺得好老套，如果我早幾十年出生，可能會對水鄉有多少少歷史感，或者係去得多香港志蓮淨苑，黃大仙，大佛，覺得呢類仿古建築冇特別之處，反而諗起行查理大橋又覺得好重歷史感，好浪漫，好多電影都在此取景，例如蜘蛛同MJ在橋上有浪漫橋段，反而覺得有種親臨其境的感覺。
去左幾個江南古鎮，見到好多店舖都有賣現代產品，那種時空交錯的突兀感令人覺得好商業化，好似每一道風景都是預先計算好的，非要令前來旅行的中國遊客活在一個偽明清的環境當中繼續旅遊。
最後驅車前往上海市中心，參觀黃浦江，幾年前曾經黎過，今次煙雨迷濛之間再次到訪，相比香港夜景，這裡的夜景一到11時就會再部關掉，幸好我地10時半左右來到，有半小時左右拍照，一到11點真係全部熄曬，猶如一座死城，本來夜景就冇咩特別，熄埋燈就更加恐怖，同香港真係冇得比，香港夜景靚太多。
金碧輝煌的建築，全部金色反而冇咩特點可言，五顏六色的夜景正d。
行左成日真係累到傻，想好好休息，明天繼續於上海戰鬥，去到格林豪泰酒店，發現原來我們訂錯左，我地訂的酒店在河南開封而非上海的開封路酒店，覺得agoda真係好垃圾，連地圖上面都冇的位置都可以比人book，情急之下要保持冷靜，旅行總會有意外事情發生。
最後我用手機搵到一間中福大酒店，唯有叫司機車我地去碰下運氣，但當時已經係凌晨一點幾。去到中福大酒店，係一間好舊的酒店，不過位置都還可以，可惜全酒店只係得返最後一間房，接待員同我地講叫我地睇下間房先，因為間房都可以訓到3人，我地上去睇，發覺好大陣霉味，但無計，¥800，唯有照訓，肚仔有點餓，於是放低行李之後去附近餐廳食野。
普通撈冷麵，味道可以。
小籠包味道好過蘇州。
最特別係呢樣，本身叫米酒，點知佢的米酒真係有米！係米水再加酒，飲完好暖，幾特別的一道菜，但勁快飽，而且好濃酒味，我都唔係飲到好多。
娃娃菜都唔差。
司機訓沙發，我地三個人一齊訓，由於俊宏琴晚撞鬼，所以佢訓中間，我地夾住佢訓，可能太累，一訓就昏迷，完全冇撞鬼直到第二朝。
