機場都好多水馬,要登機證先入得。
機場裡面冇咩人。
到左長崎機場就買張巴士車票去市中心。
有部售賣巴士車票機。
我鍾意搭巴士多過搭地鐵,因為冇咩人,而且比香港巴士準時。
到左長崎市中心。
行返去對面長崎駅。
夜晚的長崎駅唔算好多人,而且好容易就行到去對面。去JR售票處拎張九州pass,之後就去對面吉野家食野,呢度係先點餐食完之後先埋單,類近茶餐廳模式。
香港就要罷食,所以黎到日本不妨多食幾餐。
計埋都唔洗一舊水。
準備搭JR去佐賀,呢架火車直接到佐賀駅,之所以揀佐賀,係因為佐賀酒店比起長崎同福岡都比較平,而且響車站前,所以交通極之方便,抵住。
架火車有分指定席同自由席,一開始我都坐錯,之後去到自由席就是但搵個位坐。
好快就到達佐賀駅,上酒店放低行李。
酒店房間唔算好大,但穩穩陣陣,唔錯,落去買lawson宵夜食,食完就...當然係要浸下溫泉,呢間酒店有人工溫泉,落去大浴場浸人工溫泉發覺唔記得帶毛巾,唯有濕曬咁走返上房,不過酒店冷氣就唔係好勁,同埋只得一個枕頭。
呢間酒店竟然包埋早餐,第一次響日本酒店食早餐,原來係咁豐盛的,比起歐洲酒店來來去去ham & cheese,就覺得日本真係好正,樣樣我都鍾意,乾淨,睇落又衛生,就咁靜靜地自己一個食下早餐真係正,咁先係放假。