呢兩日天氣好返少少，於是我趁冇落雨連續兩日都去行山。
琴日就去左芝麻灣，其實未去之前我都唔知係咩地方黎，首先去到東涌，之後我地就等旅遊巴，用左10幾蚊左右就搭去梅窩，其實傾傾下計時間都幾快過。
去到貝澳營地我地就落車，之後我地就行下貝澳個海灘，我都唔記得左當年，同中同去個個宿營地方係邊度，印象中好似係貝澳，無論如何，行完之後我地開始沿芝麻灣郊遊徑出發。
聽講呢條係全香港最長我郊遊徑，難度唔係好高。
但係就冇咩人行，行到半路到左今日節目的重頭戲，就係一座廢棄的青年旅舍，望東灣的賽馬會青年旅舍。
一開門就有璧虎爬左出黎，好大條，內裡空氣都幾混濁。我唔係好想入去，但朋友話已經入左唯有去睇下咩事。
原來呢座建築當年都拎過獎，但位置太偏僻啦，冇人黎都係正常，結果荒廢至今。我地打開左好多間房的門睇下裡面係咩，差唔多每一度都比我地行完。
佩服自己竟然有呢種勇氣去行完所有房，其實大部份都係咩都冇，有d似睇舊樓。
響裡面停留左咁耐，好啦，出返黎感覺真好，於是我地繼續向前行，目的地係芝麻灣碼頭搭船。由於天氣都唔算好熱，所以基本上一支小水就已經好足夠，之前行山慣左帶好多水去，而家發現其實唔洗帶咁多都可以頂得到，但係肚就有少少餓，不過都頂到，傾傾下又行左好遠的路。
開頭都見到少量鬼佬，但之後完全冇人行，得我地兩個。
去到碼頭附近我地發現左一座懲教所，旁邊有個職員酒吧，門冇鎖，比我地開門行到入去，裡面有好多職員名同身份寫左響白板上面，林林總總，唔知當年傾緊d咩大茶飯，幾有趣。
後就去碼頭等7點鐘個班船，碼頭得我地兩個，我諗真係得我地咁顛會響呢個近乎無人的荒島上面留左一日，呢個監獄，戒毒所，正生書院座落的南方小島，唔知當年究竟係一個點樣的地方呢？
但經過今日，又覺得自己的地圖視野好似又搵多左一塊砌圖咁。
第二日下午一點鐘約左同系同學去行馬鞍山，真係好，行幾個字就到集合地點，連車費都唔洗浪費。好快就開始行上馬鞍山郊野公園，我覺得最辛苦應該係由耀安行上去個段，因為都幾多車經過，要避開都覺得幾煩，但假日就係咁樣，上到去郊野公園，竟然比我遇到朋友一家大小黎呢度燒烤，的確係十分之有緣。
好啦，慢慢行上昂坪大草原，以為要行好耐，點知半個鐘左右已經到左，可能幾好傾，所以不知不覺時間都好似幾快過。見到好多人玩滑翔傘，有少少牛食草，一大片草原。
好似塔門咁樣，又大風，好涼爽的天氣，可惜能見度唔算係十分之高。
但係無阻一行人的心情，唔曬反而體力消耗無咁大，睇住佢地飛又降落，留多一陣之後我地就繼續向西貢方向行，搵到北港古道就行，沿路仲有一小部份竹林都唔錯。
出左北港村後我地去返西貢公路，就沿路行去西貢市中心，其實都幾快，好似唔覺得自己行左好耐，搵到間小cafe就食野，太肚餓啦，覺得個薄餅幾好味，大家傾下旅行見聞，飲下野，之後就各自用唔同交通工具返歸。
我最方便，搭一陣就到左屋企，住馬鞍山真係好，其實西貢都幾多野食，假如諗唔到食咩，其實可以試下呢個馬鞍山「後花園」，應該有唔少驚喜。
後記
芝麻灣以前係一個越南禁閉營，之後變左戒毒所，後來又變左懲教所，網上傳冤獄而鬧鬼，「芝麻灣，九曲十三灣，有命去時沒命返」，不知真假。政府在2010年羅湖懲教所落成後將女囚犯調走，目前變左一個訓練基地，未有進一步重建計劃，之前提出的造價太貴而非議。芝麻灣半島最出名係正生書院同埋越野單車的路段，以往有地產商提出移芝麻灣的山去填海造島，也有人提出在望東灣興建骨灰龕位，惜大多不了了之。政府對大嶼山目前立場是北發展南保育，尚待觀察。