聽講下星期好似落雨，於是把握機會搵個小島去下，之後落雨先留響屋企慢慢hea。
今日去鴨洲同埋吉澳，據報2018年9月2日起，聲威實業開辦來往馬料水至吉澳、鴨洲的航線，惟只在星期六、日及公眾假期提供服務，換言之，呢條航線開左半年左右，對於我來說非常期待。
早上8點大學站等，家住附近10分鐘左右就到了，然後慢慢行去馬料水碼頭，沿途見到好多人準備搭船去各小島郊遊，似乎多數係年長人士同埋一家大小，後生仔似乎都係行山或者行街多。來回船票90蚊，8點半準時開船，10點會到達吉澳，然後馬上就駛向鴨洲，然後12點左右又會兜返我地去吉澳。
搭船會經過赤門海峽，黃竹角咀，可惜經過鬼手個陣我訓左，再經紅石門(大學個陣行過被樹枝割傷，非常難行，去到紅石門累到訓著左響石凳上)，印洲塘荔枝窩，最後去到最近沙頭角鹽田港的兩個小島，沿途天朗氣清，氣候怡人。
到達鴨洲，先去鴨洲故事館，有兩名教友做導賞。
原來鴨洲比較出名係沉積岩，只有東北幾個小島有，西貢萬宜東壩係火山岩。之後我地沿著小島行左一個圈，見到怪石奇岩嶙峋，特別係鴨咀，中間個洞只能容許一個身材不高的人通過，當然成為大家打卡的好地方。
鴨洲好簡單，北面就係鴨咀，南面係一座小山，可以望返去印洲塘同埋紅石門。我地先行上山，然後再去鴨咀，最後沿岩群繞一個圈之後返去碼頭等船開去吉澳。
去到吉澳時大約12點半左右，我地決定先行左附近的民居先，睇左荒廢的學校同埋排屋，當然仲有幾個族群的祖祠，穿番出黎澳背塘村，買左個雞屎藤茶粿試下，發覺都幾好味。
然後就返去碼頭前面的榮記餐廳叫左個海膽炒飯食，覺得好好食，120蚊睇落好似好貴，兩個人份量夠食有餘，所以每人先60蚊，但勁多海膽，我估應該係附近捉，因為如果出市區買，成本太貴，冇可能會落到咁多，個炒飯乾身得黎唔算太硬，恰到好處，配一支冰凍的五花茶，我開始明白點解退休人士一家大小咁鍾意去郊外遠足，一來遠離市區馬路，聽唔到馬路車聲，同時人都比較少，可以靜靜地有個目的地走走，假日該當如此。
食完野我地決定行上山望望，村民話行半個鐘，但我地上去只係用左十分鐘左右，個山叫橋頂，係其中一個制高點，可以望去紅石門印洲塘的方向，好寧靜的一個內海。
群山作屏障，遠望極平靜，無風無浪，同阿寒湖同摩周湖有得揮，當然呢度唔會積雪，但係都好靚，望到人心曠神怡，我諗吉澳可能係望印洲塘最靚的地方之一，正面睇曬，180度的風光。
落山之後我地都去左附近的漁村睇下建築，佢地D住宅樓宇都會寫上興建年份響門面，好多都係60年代興建，真係好耐歷史。時間都差唔多，無法行得太遠，因為得一班船離開，時間係3點半，所以都要把握時間。
返到大學5點鐘，天色尚早，仲比我見到成群候鳥飛過，情景都幾壯觀。真實睇原來真係咁靚，覺得自己有少少似水行俠，成班動物衝曬埋黎。
今日東北小島之旅完滿結束，新一年咁就去左兩個地方，今年有個好開始。