今日會挑戰大帽山，記得上年本身打算行曬針草帽，可惜趕住聽音樂會，時間唔夠，只係完成左針山同草山。
今次11點，先由大埔墟搭64K去寨乪落車，報站器痴左線，遲左一個站，搭左去白牛石，唯有行返轉頭，由寨乪村開始行上去梧桐寨。
慢慢就見到瀑布的指示牌。
梧桐寨有幾個瀑布，第一個我地去左井底瀑，水流唔算好急，慢慢蜿蜒地流落黎，好似一條白布咁，不過落去就有少少難度，事關梯級相距都幾闊。
影完相之後我地就行返上去，跟住去左中瀑，中瀑係咁多個瀑布之中最長最高，有種水銀瀉地的感覺，青樹翠蔓，蒙絡搖綴，參差披拂，而且位置比較開揚，旁邊有個洞穴，不過我地冇行入去睇。
望向後面會見到瀑布流向盡處衝落山。
我地響密林之中繼續行，好快就行左上山，山高風鉅，下盼諸峯，時出為碧嶠，時沒為銀海。望住遠處發射塔，個面就係大帽山的山頂了。
難度非常非常低，甚至可以話係不費吹灰之力就行左上咁高的地方，反而最辛苦係落去睇漫布的一段路比較陡峭，但一般遠足人士應該可以應付自如。
下瞰峭壁陰森，五色紛披，燦若圖繡，能見度唔錯，比想像中好，畢竟係冬天，天色冇夏天咁澄澈，但冇咩汗，比較乾爽，愈曬就愈覺得舒服，四顧奇峰錯列，眾壑縱橫，一層層遠去。
向西北方向望去仲會見到石崗軍營同機場，以及其他小村落，算壯觀嗎？
我覺得一般，雖然面積唔細，但比較其他遠足之旅，景色唔算太震撼，反而係地闊天長呢樣野令人行得舒服，八鄉由於天色污染物太多，同埋山勢太高，唔算望得太清楚，957米的大帽山之旅好簡單就完成左。
大帽山缺點在於冇咩標距柱，山頂只係一條分岔路，冇咩好睇。
跟住沿住馬路彎彎曲曲咁行落山，行斜路其實仲辛苦過行山路，一來趣味不大，二是腳尖會痛。
青山遍野，面積就係好大，感受到個種群山翠擁的感覺，好正。
於是我地都係取山路落山，沿來見到兩班人都有人受傷，但係山路就係刺激，可以見到好多奇石。巨石陣唔知點解會擺左響山上面，望落都幾壯觀，屹立左幾百年幾千年，係我覺得大帽山最值得欣賞的地方。
行返落去荃灣，在上角山路出返黎，行到圓玄學院就完結左今日行山之旅，唔經唔覺都行左成6個鐘，上去3小時，落去3小時，3支水，一個椰賓，剛好食曬。之前行山能見度比較差都會開濾鏡影相，今次唔開了，所以色彩落差可能比較大，風景始終實地感受最美麗。
完成左針草帽三山了，yeah!