今個星期有7條路線選擇，最後我揀左條最容易的，就係尖鼻咀。
首先我地響元朗朗屏站集合，然後慢慢行過朗屏村搵到上山的一條路，呢座髻山可以講係毫無難度，120米左右，一陣已經到山頂。
可能拜得山多，成座山的樹木都燒光咁濟，光禿禿的一座山，本身以為冇咩好睇，原來行左上頂可以望到盛屋村大井圍吳屋村同埋豐樂圍一帶的漁塘，幾靚，遠處仲見到深圳。
髻山特別的地方係有一排由行山人士搭出黎的乘涼地方，坐到唔願走，因為有少少風好舒服，望住遠方的市區，離開左吵鬧的市中心，人都好似平和少少。
坐左半個鐘，飲下水。之後我地就落返山，黎到盛屋村，想搵架單車踩下，希望踩去尖鼻咀。搵到好耐都搵唔到，全部都係損壞或者有人用緊，我地行到去元朗工業村，準備放棄搭巴士去濕地公園算。
點知就響我地放棄之際，檢驗中心門口竟然有兩部單車，又真係兩部都開到，個刻我覺得真係天無絕人之路，搵一部單車冇爛已經好難，仲要一次過有兩部。
不過踩之前我都倒D水落架車洗下，因為都幾污糟下。
好啦，出發!
未去之前我都唔知尖鼻咀響邊，原來條路線係踩入漁塘，繞過濕地公園向北方踩就見到最近海的一座警崗，個度就係尖鼻咀警崗，旁邊有觀景台可以比人影到對面后海灣同埋深圳灣的高樓大廈，景色都幾開揚。
踩漁塘最好玩的地方就係震到傻，架車都幾勁，咁多沙石都冇爆軚，踩踩下見到狗，加速避開，見到靚景就停低影下漁塘同埋附近D屋仔。
響濕地公園同埋米埔中間穿過去，有一條小馬路，好快就到左尖鼻咀，比想像中快勁多，所以我地決定踩去流浮山，睇下有冇時間去埋下白泥睇日落，我咁大個仔都未去過流浮山，期待!
但係去流浮山的一段路都唔容易，因為有時候都要避開行經的小巴，同埋有幾段上落斜，由於gobee bike係冇得較波的，所以上斜係極困難，要用死力，有時候我都頂唔住要落車推下。
好彩個天唔算好曬，頭先髻山就真係好曬，你比我揀，我寧願曬D，因為iphone響陰暗環境影出黎的相唔靚，忍下冇壞，何況有三妹太陽油加持，唔會有事! 輕鬆!
上上落落、高山低谷，終於到左流浮山，我地買左少少補給，參觀下，之後就決定向下白泥出發，呢段路有少少難，因為路就愈黎愈窄，中間仲會經過幾條廈村鄉的村落，有D養雞場奇怪的工場之類。
我反而見到好多熟悉的名字，因為呢度的工場都係政府的服務對象，之前都有接觸過佢地，真係聞名不如見面，正!
中間都停左幾次，去到上白泥真係有少少累，想就咁鎖架車響度行去算，因為呢我睇地圖，原來有上白泥中白泥最後先係下白泥，同埋個天又開始黃昏，唔知趕唔趕到。
最後我發現原來睇錯，其實影日落的下白泥根本就唔係響下白泥，原來係鴨仔灣突出去的泥灘，位置響上白泥行前少少個度，即刻我地已經到左啦，開心，即刻鎖低架車行去泥灘外面睇下。
呢個鴨仔灣的泥灘都幾大，已經有唔少遊客響度，我發現左邊原來係稔灣堆灣區，即係下白泥個度。呢個就係新界西堆填區，專收港島都市廢物，而且係用船運過黎，所以我地踩車途中都冇見過垃圾車。
去到下白泥，第一個印象就好多烏繩同臭味，之前去新界東北堆填區塘肚古道都聞到呢種腐臭味道，幾辛苦下，行出少少泥灘陣味都冇咁勁。
可惜黃昏之時太多密雲，遮住左個太陽，偶然先有金光射出，由於同睇相差太遠，所以我都放棄左影相，用肉眼欣賞下算，泥灘好易整污糟鞋，但著拖鞋又怕泥足深陷，同埋D泥唔知乾唔乾淨，可能有好多污染物。
見到D人行出少少影，又真係影到少少天空之鏡的效果，唔少情侶都取緊景，我袖手旁觀。
睇完日落就搭返出面士多門口架小巴，雖然等左陣，但架車有20座，夠大，忍下D烏繩就上左車，車返我地去天水圍西鐵站，由於奔波左一日，我都訓著左，搭車真係好好訓。
去到天水圍站買左D野食醫肚餓，之後就搭車返屋企，結束左今日亡命之旅。
由元朗工業村踩單車去下白泥，型!