之後按完就去左有Lady Boy的步行街,可算是妖氣沖天,但係D女仔真係好核突。
究竟鬼佬係咩審美觀?定係純粹貪平?
繼續行到去海邊,見到靠岸湧黎一大班內地遊客,呢樣又係好奇怪,睇過芭提雅夜景,其實只係平平無奇,而且都幾污糟,馬鞍山海濱都靚D,唔明點解咁多大陸遊客一家大細黎呢度旅行,有咩玩呢?
冇理由黎玩ladyboy?諗唔明,仲要大班人影下相,其實個景真係麻麻,不過冇呢班遊客,我諗芭提雅都冇咩可以發展。
如果有去過七一遊行,大概當晚海濱人龍就係咁上下,擠得水洩不通,都好壯觀下,完全冇泰國人,覺得自己好安全,因為前後左右都係講普通話哈,其實一家人去旅行都係開心的。
行完步行街,突然之間又落大雨,於是我地是但搵左間西餐廳入去食。
大家可能肚餓,於是各自都叫意粉,得我叫D基本野食,炒飯,我覺得味道都正常,佢地覺得D意粉唔好食,個鬼佬老闆仲行埋黎問我地好唔好食,虛應之,其實真係麻麻。
呢間伏野要記住,叫Blackpearl。
食完野見步行街旁邊有間華人開的藥妝,就專心買下手信比細妹,比錢個陣例牌問下有冇得平D,平左幾十蚊泰銖,偉哥都問埋一份,最後得到一假免費的慘叫雞。
返到酒店係咁玩,傳來陣陣慘叫,笑死。
食完野就返去酒店點算下手信,之後大家都好似有點累,其實諗返轉頭全日都冇咩郁動過,比起歐洲之旅可謂輕鬆勁多,不過大家想悠閒D我都樂意奉陪。
之後我同偉哥落樓下Family Mart買番D日用品、宵夜同埋手信,兩條友又隊下啤渡過左一晚,開心!