下午接近5點的時間,我們搭火車到達奈良,天氣忽然放晴,我們走在奈良的大街上。
日本的街道有種魅力,幾好行,屋仔簡簡單單,慢活。
走在風中今天陽光忽然好溫柔,呢種天氣行街最舒服,原來奈良公園同車站都有段距離,又要辛苦細妹陪我走過呢段長路。
可惜天空太多電線。
到左奈良公園,水天一色,雖然接近黃昏,天色反而更好。
開始散步!
其實我地都唔知向咩方向,總之有路就行,呢度人流唔算好多,好行。
開始見到鹿仔了! 仲見到佢地過馬路,所有車都停低等佢地過,好得意!
來到一個草地,同班鹿仔玩左陣,有D坐低左,似乎佢地唔夠掂D鹿,我唔明有咩好驚。
呢隻鹿仔好得意,我行到極近佢都唔怕,仲摸左佢一下,不過細妹唔夠膽,只在旁邊蹲下。
呢度風景真係唔錯,好空曠,公園大到無倫,比起京都,呢度少D廟,多左好大片草地。
話口未完,終於到左春日大社。
前面路唔知通去邊,妹有D疲累,但依然同我行埋呢段路,開心!
感覺係不枉此行,本來見天黑仲打算放棄奈良,最後發現堅持落去係睇多左風景,我覺得此行最靚係奈良同埋稻荷,唔係因為D景靚過其他地方,而係因為大家堅持落去,反而有出乎意料的收獲。
有夕陽了,呢度好幽靜,仲幫細妹影左好多唱片封面照片。
行到祈福處,是但響人地許願的木塊上寫上大家的心願哈,入大學,見到有D香港人寫愛情字句,真係滴汗,服!
後來覺得還是自己比錢寫一塊會更好,掛了上去,希望願望成真,平安響歐洲回來,結果都願望成真。
太陽落山了,我地都係時候走了。
可是發覺行錯路,唔識出返去,見到若草山,好大片草地,可惜差不多日落已經關門了。
繼續向前行,由於黃昏,已經冇曬遊客,任我行。
湖景幽幽,唔識路到要行埋馬路先出得返去。
連鹿仔都坐低曬抖抖,玩左成日,唔知佢地習慣日出而作、日入而息嗎?至少佢同我都唔洗再補鐘。
夕陽好靚,好似火燒山咁。
幾經辛苦終於出左奈良公園,一見有餐廳就衝入,係一間關西燒餐廳,好香,而且好好玩,我地都食到好飽好開心,我發覺夜晚飯係比較豐富,日頭餐廳反而香港比較易搵到。
燒得好香好好味,喪叫喪燒真係好正,唔洗理價錢,最後比起預期係平,可能因為人多,每人消費反而少左,D醬汁又係好正,一流。
我覺得最好味都係海鮮同埋牛肉,一試難吃,好珍惜咁食曬每一舊,呢間餐廳仲要除鞋,正!
順便響奈良買左好多餅仔,大家都覺得奈良買手信係最抵,又大盒,包得靚,最緊要係平,而且都幾好味,佢地多朋友係咁,要買幾十盒先夠。
之後兩日都係響大阪心齋橋同埋京都掃貨同食下日本菜,冇咩特別,所以就略過不述,做返一個普通香港人,這次日本之旅,頭幾日簡直係野外定向,最後慢慢變返真係食玩訓,係一個唔錯的體驗,影左好多好靚的照片。
不過好似未試過冬天去旅行,或者下次冒險可以試下冬天去旅行。
另記:
之後個日有玩天保山摩天輪,但有點畏高,有段時間唔敢張開眼,後來去歐洲才克服畏高,但夜景好壯觀,高處不勝寒。
京都水族館,第一次咁近見到企鵝,仲要咁多隻,唔知佢地企響度諗咩。