《返深圳自助免試拎大陸車牌可行！》

跟從HK01返大陸免試拎牌攻略，早幾日用微訊預約，今日大約9點鐘到上水站，之後搭車去羅湖再搭去光明站，搭去大約1小時左右，因為站數比較多，但全程地鐵都有位坐，其實更加簡單係搭去科學園再轉光明站，唔洗轉咁多次。

去到光明站之後一條大直路行去車管所，大約10點半，排隊拎籌做體檢，體檢要等大約1小時，等待期間職員問我地係咪香港人，然後就帶我地去櫃台先搞手續比車牌錢，530蚊港幣6年牌費，搞完之後繼續排隊。

體檢走入一部機入面度高磅重睇視力，然後順便影埋相，價錢合共港幣60蚊。

驗完之後將相同體檢報告交比職員，大約12點，佢話職員食飯，咁我地都去附近鳳凰城食野，再行埋街，之後大約2點搭的士10幾蚊返去車管所。去到用左半個鐘就拎到張證，非常順利。

相比上次甩P去運輸署拎籌，我當時大約8點半到，搞到11點先可以離開，大陸辦證其實逗留係車管所時間只係2小時，比香港搞車牌更加快左少少，服務態度都幾好。 

如果用網上車牌代辦的價錢，每位要1700蚊，而且亦要親身上大陸，需時3小時，自己上去辦證仲可以順便食下野行下街，價錢590蚊，不必找人代辦車牌。