本身買左張國泰機票打算自己去杭州旅行，點知同朋友提完之後佢地又買左張機票跟埋我去杭州，杭州唔適合佢地玩，去其實都係浪費金錢，下次都係唔好講比較好，可以自己一個好好享受一下。
事前都有大約plan過點玩法，本身我自己就想沿鐵路站行下，去杭州，蘇州，上海，後來佢地想去d古鎮，於是我地最後決定包車去，價錢就¥2700，每人¥900，未出發先比一半前，基本上淘寶都有包車可以購買。
酒店方面，同得朋友去，預左冇得住好少少，不過只係3日2夜就算啦。
放左工之後我就由旺角搭機場快線去機場，大約6：30左右到達機場，都好快，其實可以多d自己一個去旅行都唔錯，特別係台中台南。
去到先知原來班機延遲左飛，9：45pm先起飛，去到杭州時候已經係夜晚12點鐘啦。到步之後就急步行出機場等的士，行左一段路先發現的士站，但人山人海，排左15分鐘左右到我地上車。
上到車個司機好似好躁咁，不發一語，一路睇劇一路渣車，痴鬼線！仲要渣到120公里，我有少少驚，加上佢又唔識，就咁放左我地響酒店幾條街以外的地方，用高德地圖行左入去民居再穿出先響南宋御街見到我地住既宜必思酒店。
其實今次旅程好短，今晚12點，加埋聽日一日，最後一日夜晚7點半機，嚴格黎講得1.5日，所以要好好把握時間。酒店好頹，首先係冇凍水，d水係熱到傻，我自己一間房，唯有去朋友間房度沖涼，其次係冇冷氣，夜晚訓到成身汗，唯一好係幾乾淨，呢樣已經值得慶幸。
約好左第二日凌晨5點起身，6點出門，所以大家都想早d訓，其實早d都係講緊2點，只係得3個鐘頭訓覺，後生就係要咁顛先好玩。
好啦，我就玩下手機，都冇打算早訓，今次準備充足，大把電玩手機，大約5點鐘我醒左，原來玩到訓著左，咁我就去敲佢地房門，冇人應，唯有等佢地醒啦。後來佢地醒左我行入去，見佢地神色凝重，就問佢地發生咩事。
朋友俊宏就同我講原來佢撞鬼，事情大約係咁，佢響樓下民居行個陣都有少少心緒不寧，我地住頂樓，佢地間房無窗，可能怨氣未散到，我間房係尾房，但係就有窗，夜晚冇咩野睇。話說佢地兩個訓著左，訓到半路俊宏冇啦啦起左身大叫，佢地形容個種叫係大聲到全層都聽到，佢話訓到半路，感覺到一股寒氣侵襲佢左邊肋骨以下位置，佢叫完自己都唔記得發生咩事，只係覺得個心跳得好快，甚至覺得可能唔係佢自己控制去大叫。
我就覺得冇咩野，於是快快手收拾行李離開酒店。
驚魂未家，就要開始玩！