《日本手信．從今開始 不讓憾事循環》

去日本前都有睇過某d文章話日本必買手信，於是我就真係買左佢地口中所講必買手信返黎，返到香港我嘗試睇下究竟香港有冇得買，又或者有得買的話到底香港抵買定日本抵買。

以下我將會比較下兩地的藥品到底有咩唔同，價錢以2019年6月為准。

uniqlo t shirt，香港買就大約99蚊，日本買就要¥1500，即108.65，已經扣左消費稅，日本買仲貴！

日本suit select ¥980一件恤衫，即係71蚊，買得太少，所以冇得扣稅，香港最平G2000恤衫都要139蚊，呢方面日本勝出，抵買！

Socks方面，日本就¥790三對，即係58蚊三對，香港一對就30蚊，但係唔知買三對會唔會平d，估計應該就係日本平d，抵買！

呢個熱眼敷眼罩原來香港普通藥房都有得買，去東京買就真係傻，因為我東京買就要¥458，即係33蚊左右，香港藥房買就34蚊，其實都冇咩分別，唔洗特登走去東京買。

液體絆創膏就¥760，即係55蚊，香港買呢？59蚊，日本只係平幾蚊。

休足時間日本東京賣¥578，即42蚊，香港賣緊70蚊，呢方面就的確差得比較遠，如果大量響日本買就真係抵，因為相差28蚊，買十盒就差280蚊。不過我試過用，除左涼浸浸之外其實都冇咩太大感覺，所以就算抵買我都未必再買，反而個眼罩熱熱地就真係幾舒服 ，值得香港再買。

呢種眼藥水我買比細妹，所以唔知有冇用，日本買就¥598，即係43蚊左右，有8ml，香港買就要56蚊，而且得7ml，如果好用的話應該係日本買係抵d，值得去買。

呢盒止痛藥日本買要¥1680，即係121蚊，但係香港代購網只係80蚊，不過未試過用香港代購網唔知真定假，但係街邊就冇得買，買左兩盒，的確係幾貴。

呢隻日本酒口味朱古力，日本賣價錢係58蚊，但係香港買價錢係98蚊，日本買真係抵d。正！同樣地紫薯都係一樣價錢，所以唔錯的。上次收過朋友買黎的白色戀人，香港賣就98蚊，日本都係58蚊，其實手信都係咁上下價錢。

冇可比性的手信似乎都係最好，下次去旅行應該集中買呢類手信，咁就唔會因為香港有得買或者平d而覺得買錯。

富士山的火山杯

富士山的發聲棒

富士山的手巾一條

比同事的山梨白桃蛋糕，都幾好味。

富士山的羊羹

《漁塘．公路單車．同在這裡再呼吸這空氣》

因為上次行山去過信義新村同料壆行到半死，見到人地踩單車都幾爽，所以今日嘗試踩下上水的單車路線，首先去上水火車站租單車，一日百2蚊。

之後就開始搵路踩去漁塘。

經過左工業區先。

中間都要搵下路。

要踩一小段馬路。

之後到左上水屠房，沿住旁邊一條長路直踩。

都幾陰森下。

踩到盡頭就會見到梧桐河，呢條河算係幾靚，可能因為天氣好的關係。

再踩落去會見到一條通道，條通道上面就係火車，火車經過時響下面踩都幾驚，因為好近好好嘈，而且通道唔高，彎低身費事撞到頭，加上路面不平同埋暗，減速慢慢踩係最好。

過左天橋就會見到一大堆水管，東江水的水管，由於好大好粗，所以有d人會行上去影相，但我望過高度大約一層樓高，一差錯腳就受傷，所以都係冇行上去。

沿住呢條鐵板路就可來回水管。

梧桐河一直流到落黎呢度。

繼續踩就開始見到一大片平原。

望返轉頭，中間段路凹落去的地方有一大片水，因為旁邊條河一旦泛濫d水就會湧左入去，所以踩過時候比較污糟。

繼續向前踩就會見到得月樓警崗。

前行就係羅湖車站，但係封住左，所以唔行得過去。

繼續向前踩。

開始進入漁塘的領域啦，一大片草地，遠處一兩座小村屋。

前面一大個漁塘，由於個天好藍，睇落好似藍色的湖。

山水之樂。

靚到唔多似香港，少少墾丁的感覺。

遠處會見到深圳的高樓大廈，踩單車過程中唔算多蚊，可能踩得快同埋幾大風，但一定要太陽油，陽光好猛，但唔算熱到好侷促，但路途顛簸不平，係唯一辛苦的地方，要放輕手腳去踩 ，否則屁股好痛。

到左一大片漁塘，沿路都好開揚。

對面建築物愈來愈近。

呢位伯伯願意帶路，佢話前面再行有狗，結果真係，我地踩到好入下，d狗幾隻跑出黎狂吠，伯伯拎起鐵鍊打地下佢地就彈開。

可惜彈到黎我腳邊叫，我就唔郁，少少驚，不過最後繼續向前踩冇理佢地，佢地都冇咬我。

好快就見到青青草原，奇怪又真係冇咩蚊，恬靜悠閑。

另一面就見到深圳高樓大廈，可能佢地都係望緊我地呢面漁塘。

漁塘的路雖然顛簸，但係望落去幼幼地其實都幾靚。

佢地兩個談古論今，我就響後面自己影相。

就這樣一直踩到盡頭。

出左漁塘之後向落馬洲方向踩，最後到達米埔，路程唔算太長，但係就冇咩野好睇，到左米埔之後就決定掉頭。

臨走時響呢間無人士多買左支寶礦力，頭頂曬到出煙，好快就飲曬成罐，爽呀。又有力繼續踩返轉頭啦。

之後我地冇沿路踩返去，而係行捷徑，即係青山公路，當左自己渣私家車，響雙黃線行走，見到紅燈就停，段路係直路，冇下白泥咁多起伏，但都幾長，考驗意志，踩得太耐屁股會感到疼痛。最後返去上水交車，全程大約3個小時左右，途中經過梧桐河，深圳河同埋河套地區，沿住邊界道路前進，最後過埋落馬洲站先到米埔，對於邊境地勢又清楚多少少。